بقلم / أحمد كامل
اليوم الاول
حقا انها خلية نحل ........هي ايه دي اللي خلية نحل متقرأ ياعم مستعجل ليه
بالصدفه عرفت ان في تجمع للتويبس بتوع حزب العدل وسألت وعرفت الميعاد وقولت اشوف ايه الموضوع واحضر وفعلا حصل وحضرت وكان تجمع لطيف ظريف تخلله الكثير من الخروج عن الموضوع الرئيسي (العادي في النقاش بين المصريين)واتكلمنا في حاجات كتير واقدر اقول انها كانت قعدة مثمرة وكله في دماغه انه هيخلص ويروح بس خير اللهم اجعله خير عرفنا ان مطلوب من الحزب كتابة اسماء الموكلين بشكل يدوي شرط من شروط لجنة الاحزاب واللي كان فاضي راح مقر اخر يساعد اللي شغالين في تجميع وكتابة الاسماء الكلام ده حوالي الساعة تمانية ونص تسعه وهناك تري خليه نحل تحس انها فوضوية الي حد ما بس مع مرور الوقت بقي اكثر تنظيما لحد مبقت خلية نحل فعلية شباب حزب العدل عملوا مجهود خرافي ورائع وعملوا المطلوب وعلي ستة الصبح كنا جاهزين والكل خلاص مش عايز ينام وعايزين نروح لجنة شئون الاحزاب ونستني الاخطار علشان نحس ان مجهودنا جاب نتيجه واحد بيقولي خف رغي شوية وانجز ...............حاضر
المهم قضينا الكام ساعة دول لحد متجمعنا عند دار القضاء العالي وطلعنا للجنة وكانت الصدمة ان مفيش موظفين فاضيين يستلموا مننا ورق اصل بعيد عنكم في حزبين راحوا وحجزوهم مع ان ورقهم مش كامل وقعدوا يكتبوه بس ما علينا .... طبعا محاولات كتيرة اننا نقدر نقدم الورق ومفيش فايده والكل مش عايز يحط في دماغه ان ممكن بعد الليلة اللي فاتت دي ان يبقي في احتمال اننا نشيل التوكيلات ونرجع بيها تاني بس للاسف ده اللي حصل ..................مفيش موظفين فاضيين فوت علينا بكرة ياعدل .......حاضر
التجمع بكرة سبعة ونص هنا يا شباااااااااااااااااااااب ........بس انا كنت حاسس بخيبة امل رهيبة بس حاضر
اليوم الثاني
سبعه الصبح امام دار القضاء العالي والدنيا هس هس كده طبعا اللي اتلسع من الشوربه ينفخ في الزبادي عملت دور المفتش كرومبو ولزقت للعسكري علشان اتأكد ان مفيش حزب هيطلع قبلنا وجت تمانية وبدأ اعضاء الحزب في التجمع وطلعنا وعلي عكس اليوم السابق ربنا كان مسهلها علي الاخر اه كان في حاجات صغيرة ناقصة خصوصا انهم طلبوا كوبي سوفت من اسامي الموكلين ده غير اللي بخط اليد بس عادي كله كان عايز يعمل اي حاجه علشان نخلص اللي كانوا موجودين في الحزب كانوا بنفس النشاط والنظام بتاع خلية النحل اللي في الاول فاكرين؟؟طب خلاص فاكرين متزقوش
الوقت بيعدي ودوسيهات عماله تدخل تتفرز ومحافظة تخلص واللي وراها تخلص ويتصلوا باعضاء يجو يساعدوا تلاقي كله ساب اللي في ايده وجه .جت الساعة اربعه كان خلاص كل التوكيلات اتراجعت والحياه بقت لونها افتح قوي والعصبية والتوتر راح وبدأنا بقي نبتسم شوية بدل مكنا شبه البؤساء المهم ساعة وهلت البشاير الاخطار بقي معانا ولأول مرة في اليومين دول اشوف وشوش اعضاء حزب العدل بكامل حيويتها ونضارتها والدموية كده بتجري فيها وكانت فرحه ولا فرحه المنتخب لما جدو جابلنا كاس الامم ووقفنا نتصور مع الاخطار زي ماللاعيبة وقفت تتصور مع كاس افريقيا بالضبط :D
اه تعبنا تعب كبير وبجد اتأكدت ان الحزب ده فيه طاقه رهيبة من الاعضاء يارب نعرف نستغل كل طاقتهم في حاجات ايجابية ساعتها هنبقي من اقوي الاحزاب في تاريخ مصر الحديث والقديم وحتي من ايام الفراعنة ايوة ايوة مش كدب ممكن يكون تفاؤل بس انا حسيت كده بجد في اليومين اللي فاتوا ان الناس مش داخلة حزب للوجاهة ولا علشان يبقي اسمي في حزب كله عايز حاجه وعملها بنفس روحنا واحنا في التحرير كله بيساعد كله .وخمسه وربع كنا في الشارع لاول مرة من تمانية الصبح ومعانا كاس افريقيا اللي جابوه كـــــــــــــــــــــــــل اعضاء حزب العدل مش جدو :D
2 التعليقات:
بس يا أحمد احنا لما روحنا أول مرة مرجعناش بالتوكيلات ، سلمناها و الإجراءات كملت اليوم اللي بعده ، الإمضاءات أقصد
تعليق أخير ، طلع في دفتر كامل متمضاش عليه !!! فجأة اللجنة اكتشفته وانهاردة الوكلاء راحوا يكملوا
=))
لا رجعنا بالتوكيلات وتاني يوم وديناها تانا
والنهارده كنت هناك علشان السوفت كوبي بتاع اسامي الموكلين لسه مخلصتش وهنكمل برضه يوم الاحد
إرسال تعليق